ఐకాన్ స్టార్ అల్లు అర్జున్ ఇటీవల ఎదుర్కొన్న చట్టపరమైన సమస్యలు టాలీవుడ్‌లో తీవ్ర చర్చనీయాంశంగా మారాయి. హైకోర్టు మధ్యంతర బెయిల్ మంజూరు చేసినప్పటికీ, కొన్ని పరిణామాల కారణంగా అల్లు అర్జున్ ఒక రాత్రి చంచల్‌గూడ జైలులో గడపాల్సి వచ్చింది. తర్వాత ఉదయం బైటకు వచ్చిన బన్నీ, మొదటగా తన పెదమామ మెగాస్టార్ చిరంజీవి ఇంటికి వెళ్లి ఆయనతో గంటసేపు గడిపారు. ఆ తర్వాత నాగబాబు ఇంటికి వెళ్లిన బన్నీ, పలు వ్యక్తిగత అంశాలపై చర్చించినట్లు సమాచారం. ఈ ఘటనలతో మెగా, అల్లు కుటుంబాల మధ్య ఉన్న విభేదాలు తాత్కాలికంగా పరిష్కారమయ్యాయని అందరూ భావించారు.
అయితే ఈ నేపథ్యంలో రామ్ చరణ్, వరుణ్ తేజ్, సాయిధరమ్ తేజ్ నిశ్శబ్దం మాత్రం కొత్త చర్చకు దారితీసింది. ఈ సంఘటన జరిగినప్పటికీ రామ్ చరణ్ బన్నీకి ఫోన్ చేయకపోవడం, కనీసం పరామర్శించకపోవడం ఆశ్చర్యానికి గురి చేసింది. ఇదే విధంగా, వరుణ్ తేజ్ కూడా “మట్కా” సినిమా వేడుకలో పరోక్ష వ్యాఖ్యలు చేయడం గమనార్హం. సాయిధరమ్ తేజ్ సైతం ఈ అంశంపై స్పందించకపోవడం మరో ఆసక్తికరమైన అంశంగా మారింది. బన్నీ పుష్ప 2 సినిమా ప్రమోషన్ సమయంలో మాత్రం ఈ హీరోలు విషెస్ చెబుతూ మర్యాద పూర్వకంగా వ్యవహరించారు. అయితే ఈ విషెస్ కేవలం సినిమాకు సంబంధించి మాత్రమేనని, వ్యక్తిగతంగా వారి మధ్య మాటలేమీ జరగలేదని స్పష్టమవుతోంది. దీంతో మెగా హీరోల నిశ్శబ్దానికి ప్రత్యేక కారణాలు ఉన్నాయని పరిశీలకులు అంటున్నారు.
ఇక మెగాస్టార్ చిరంజీవి, పవన్ కల్యాణ్, నాగబాబు ఈ విషయంపై స్పందించినప్పటికీ, రామ్ చరణ్ మరియు ఇతర యువ హీరోలు స్పందించకపోవడం బన్నీ వ్యక్తిగత నిర్ణయాలపై అనుమానాలను రేకెత్తిస్తోంది. బన్నీ తన శక్తితో, ప్రతిభతో స్వతంత్రంగా ఎదగాలని అనుకుంటున్నాడా? లేక ఇతర కుటుంబ విభేదాలున్నాయా? అనే ప్రశ్నలకు ఇంకా సమాధానం దొరకడంలేదు.