కోలీవుడ్‌ స్టార్ కార్తి హీరోగా తెరకెక్కుతోన్న కొత్త చిత్రం సర్దార్ 2. ఇటీవల ఈ మూవీ షూటింగ్ ప్రారంభం కాగా.. ఈ మూవీ సెట్‌లో తాజాగా ప్రమాదం చోటు చేసుకొంది. ఫైట్‌ సీన్స్‌ ప్రాక్టీస్‌ చేస్తున్న స్టంట్మ్యాన్ ఎజుమలై ప్రమాదవశాత్తూ 20 అడుగుల ఎత్తునుంచి కింద పడిపోయారు. వెంటనే స్పందించిన మూవీటీమ్ అతడిని హాస్పిటల్కు తీసుకెళ్లింది. కానీ ఫలితం దక్కలేదు. అంత ఎత్తు నుంచి కిందపడటం వల్ల ఛాతీ భాగంలో తీవ్ర గాయం అయిందని వైద్యులు తెలపారు. ఊపిరితిత్తుల్లో రక్తస్రావం కావడం వల్ల ఎజుమలై మృతి చెందాడని వైద్యులు నిర్థరించారని సమాచారం. ఈ ప్రమాదంపై స్థానిక పోలీసులు దర్యాప్తు చేస్తున్నారు.
రెండేళ్ల కిందట రిలీజైన సర్దార్ సినిమా ఏ రేంజ్‌లో బ్లాక్ బస్టర్ కొట్టిందో ప్రత్యేకించి చెప్పనవసరం లేదు. స్పై యాక్షన్‌ థ్రిల్లర్‌ నేపథ్యంలో తెరకెక్కిన ఈ మూవీలో కార్తి డ్యూయల్ రోల్‌లో నటించాడు. తండ్రి, కొడుకుగా మంచి నటనను కనబరిచాడు. కార్తికి జోడీగా రాశిఖన్నా, రజిషా విజయన్‌ నటించారు. తెలుగులో ఈ సినిమాను అన్నపూర్ణ స్టూడీయోస్‌ బ్యానర్‌పై అక్కినేని నాగార్జున రిలీజ్ చేశాడు. తెలుగులో కూడా ఈ సినిమా మంచి లాభాలు తెచ్చిపెట్టింది. ఇక ఫైనల్ రన్‌లో ఈ సినిమా ఏకంగా వంద కోట్లు కొల్లగొట్టింది. పీఎస్ మిత్రన్ దర్శకత్వం వహించిన ఈ సినిమాకు ఇప్పుడు సీక్వెల్ తెరకెక్కుతుంది. ఈ సారి బడ్జెట్‌ కూడా పెరిగిందని తెలుస్తుంది. అంతేకాకుండా ఈ సినిమాను పాన్ ఇండియా వైడ్‌గా రిలీజ్ చేయాలని ప్లాన్ చేస్తున్నారు. కానీ ఇప్పుడు అనుకోకుండా ప్రమాదం జరగడంతో షూటింగ్ కు బ్రేక్ పడే అవకాశం ఉంది.
