రెండు తెలుగు రాష్ట్రాల్లో ఎన్నికల హడావిడి నడుస్తుంది. ముఖ్యంగా ఏపీలో ఎన్నికల సమరం మాములుగా లేదు. నువ్వా..నేనా అనేంతలా అక్కడి రాజకీయాలు నడుస్తున్నాయి. జగన్ ను గద్దె దించడమే లక్ష్యంగా కూటమి నేతలు తమ ప్రచారంతో హోరెత్తిస్తున్నారు. ఇటు సోషల్ మీడియా లోను ఇరు పార్టీలు పోటాపోటీగా ప్రచారం చేస్తూ గెలుపే లక్ష్యంగా వ్యూహాలు రచిస్తున్నాయి. ఈ తరుణంలో లీడర్ మూవీ రీ రిలీజ్ కాబోతుంది.
రానా దగ్గుపాటి హీరోగా నటించిన ఈ మూవీని శేఖర్ కమ్ముల డైరెక్ట్ చేసాడు. రాజకీయ కోణంలో తెరకెక్కిన ఈ మూవీ 2010 లో విడుదలై పాజిటివ్ టాక్ సొంతం చేసుకుంది. ఈ మూవీ కథ విషయానికి వస్తే ..
ముఖ్యమంత్రి సంజీవయ్య (సుమన్) హత్యకు గురవుతాడు. అమెరికాలో వుంటున్న ముఖ్యమంత్రి కొడుకు అర్జున్ ప్రసాద్ (రానా) తన తండ్రి చివరి కోరిక ప్రకారం తదుపరి ముఖ్యమంత్రి కావాలనుకుంటాడు. అప్పటికే ముఖ్యమంత్రి అన్న కొడుకు ధనుంజయ (సుబ్బరాజు) తానూ ముఖ్యమంత్రి కావడానికి అన్ని ప్రయత్నాలు చేస్తాడు. రాజకీయాలలో ఏ మాత్రం అనుభవం లేని అర్జున్ ధనుంజయని, ఆ పార్టీ సభ్యులని తన దారిలోకి తెచ్చుకుని ముఖ్యమంత్రి అవుతాడు. అది భరించలేని ధనుంజయ ముఖ్యమంత్రి పై దాడి చేయిస్తాడు. ఆ తర్వాత అర్జున్ ను ముఖ్యమంత్రి పదవి నుండి దించడానికి రకరకాల ప్రయత్నాలు చేస్తుంటాడు ధనుంజయ.
రాష్ట్రంలో లక్ష కోట్ల రూపాయల నల్ల ధనాన్ని బయటికి తీసి ప్రజలకి అందేలా చూడాలన్న లక్ష్యంతో ఉన్న అర్జున్ ప్రసాద్ తన ముఖ్యమంత్రి పదవి కాపాడుకోవడం కోసం తన పార్టీకి ప్రధాన మద్దతుదారయిన మునుస్వామి (ఆహుతి ప్రసాద్) కూతురు అర్చన (రిచా గంగోపాధ్యాయ్) ని ప్రేమిస్తున్నట్లు నటిస్తాడు. కానీ, తన ప్రయత్నం ఫలించదు. అర్జున్ రాజీనామా చేస్తాడు. ఎన్నికలు వస్తాయి. ప్రజలను చెత్యనవంతులను చేసి, రాజకీయ వేత్తగా కాక, నాయకుడవుతాడు ఇది కథ. ఇలాంటి కథ ఇప్పుడు మరోసారి ప్రేక్షకుల ముందుకు రాబోతుండడం..అది కూడా ఎన్నికల సమయంలో రీ రిలీజ్ అవుతుండంతో దీని ఎఫెక్ట్ ఖచ్చితంగా ప్రజల ఫై పడుతుందని అంత భావిస్తున్నారు.
మే9వ తేదీన లీడర్ సినిమా రీ రిలీజ్ అవుతుందని ప్రచారం జరుగుతోంది. అయితే ప్రస్తుతం రెండు తెలుగు రాష్ట్రాల్లో పొలిటికల్‌ హీట్‌ ఓ రేంజ్ లో ఉంది. మే 13వ తేదీన పోలింగ్ జరగనుంది. అక్కడికి నాలుగు రోజుల ముందు లీడర్ రీ రిలీజ్ అయితే మామూలుగా ఉండదు. ఇక కొన్ని నెలలుగా టాలీవుడ్ రీ రిలీజ్ ల ట్రెండ్ కొనసాగుతోంది. అనేక చిత్రాలు వరుసగా మళ్లీ ప్రేక్షకుల ముందుకు వస్తున్నాయి. అప్పట్లో నార్మల్ హిట్ అయిన సినిమాలు కూడా రీ రిలీజ్ లో మంచి వసూళ్లు సాధిస్తున్నాయి. అయితే ఇప్పటి వరకు రీ రిలీజ్ అయిన సినిమాల్లో లీడర్ ఒక స్పెషల్ మూవీ అని చెప్పవచ్చు.
