గణ తంత్ర దినోత్సవం సందర్బంగా కేంద్ర ప్రభుత్వం పద్మ పురస్కారాలను ప్రకటించింది. కళలు విభాగంలో నటసింహం నందమూరి బాలకృష్ణ, తమిళ స్టార్ హీరో అజిత్ , ప్రముఖ నటి శోభన , కన్నడ దిగ్గజ నటులు అనంత్ నాగ్ లతో పాటుగా ప్రముఖ బాలీవుడ్ దర్శకుడు శేఖర్ కపూర్ లకు కేంద్ర ప్రభుత్వం పద్మభూషణ్ ప్రకటించింది.
నటసింహం నందమూరి బాలకృష్ణ నటుడిగా , క్యాన్సర్ హాస్పిటల్ చైర్మన్ గా , హిందూపురం శాసన సభ్యులుగా విశిష్ట సేవలు అందిస్తున్నారు. బాలయ్యకు పద్మభూషణ్ పురస్కారాన్ని కేంద్ర ప్రభుత్వం ప్రకటించడంతో నందమూరి అభిమానుల సంతోషానికి అవధులు లేకుండాపోయాయి. ఇక తెలుగు సినిమా రంగం నుండి మాత్రమే కాకుండా రాజకీయ రంగం నుండి కూడా పెద్ద ఎత్తున బాలయ్యకు శుభాకాంక్షలు తెలియజేస్తున్నారు. దాంతో అందరికీ కృతఙ్ఞతలు తెలియజేస్తూ పత్రికా ప్రకటన విడుదల చేసారు.
తమిళంలో స్టార్ హీరోగా ఓ వెలుగు వెలుగుతున్నారు అజిత్. హీరోగా నటించడమే కాకుండా పలు సేవా కార్యక్రమాలు కూడా నిర్వహిస్తున్నారు అజిత్. తమ అభిమాన హీరోకు కేంద్ర ప్రభుత్వం పదభూషణ్ ప్రకటించడంతో హర్షం వ్యక్తం చేస్తున్నారు అజిత్ అభిమానులు అలాగే తమిళ సినీ పరిశ్రమ.
80 వ దశకంలో స్టార్ హీరోయిన్ గా సత్తా చాటింది శోభన. తెలుగు, తమిళ , మలయాళ , కన్నడ భాషల్లో పలు చిత్రాల్లో హీరోయిన్ గా నటించింది. ఇక ఇప్పుడేమో క్యారెక్టర్ ఆర్టిస్ట్ గా సెకండ్ ఇన్నింగ్స్ స్టార్ట్ చేసింది. మంచి అభినయంతో ప్రేక్షకుల మనసు గెలుచుకున్న శోభనకు కేంద్ర ప్రభుత్వం పద్మభూషణ్ పురస్కారాన్ని ప్రకటించడంతో హర్షాతిరేకాలు వ్యక్తం అవుతున్నాయి. అలాగే కన్నడ నటులు అనంత్ నాగ్ కు బాలీవుడ్ దర్శకుడు శేఖర్ కపూర్ కు కూడా శుభాకాంక్షలు వెల్లువెత్తుతున్నాయి.
