టాలీవుడ్‌ నటుడు శ్రీతేజ్‌పై కూకట్‌పల్లి పోలీస్ స్టేషన్‌లో మరోసారి కేసు నమోదవడం వివాదాస్పదంగా మారింది. యువతిని పెళ్లి చేసుకుంటానని నమ్మించి మోసం చేశాడనే ఆరోపణలతో కేసు నమోదైనట్లు సమాచారం. సంబంధిత సెక్షన్ల కింద ఆయనపై కేసు నమోదు చేసినట్లు పోలీసులు తెలిపారు. ఇదివరకు కూడా శ్రీతేజ్ వివాదాల్లో చిక్కుకున్నాడు. పెళ్లయిన మహిళతో వివాహేతర సంబంధం కొనసాగించడం, ఆ ప్రభావంతో ఆమె భర్త గుండెపోటుతో మరణించాడనే ఆరోపణలపై అప్పట్లో కేసు నమోదైంది.
శ్రీతేజ్ తన సినీ ప్రస్థానంలో అనేక ప్రముఖ చిత్రాల్లో నటించాడు. ప్రత్యేకించి రామ్ గోపాల్ వర్మ తెరకెక్కించిన లక్ష్మీస్‌ ఎన్టీఆర్ చిత్రంలో చంద్రబాబు పాత్రలో నటించి పేరు తెచ్చుకున్నాడు. అలాగే ధమాకా, పుష్ప ది రైజ్, వంగవీటి, మంగళవారం వంటి చిత్రాల్లోనూ తన ప్రతిభ చూపించి మంచి గుర్తింపు పొందాడు. ఆయన ప్రస్తుతం పుష్ప ది రూల్ చిత్రంలోనూ పాత్ర పోషిస్తున్నట్లు సమాచారం. ఈ తాజా కేసు అతని వ్యక్తిగత జీవితంపై మరింత ప్రశ్నలు లేవనెత్తనుంది.