దర్శకధీరుడు రాజమౌళి గురించి ప్రత్యేకంగా చెప్పాల్సిన అవసరం లేదు. ఈగ, బాహుబలి 1, 2 చిత్రాలతో తెలుగు సినిమాను ప్రపంచవేదికపై సగౌరవంగా నిలబెట్టారు. ఇక ఆర్ఆర్ఆర్ చిత్రంతో ఏకంగా ఆస్కార్ అవార్డును దక్కించుకొని.. హాలీవుడ్ అంతా మనవైపు తిరిగి చూసేలా చేశారు. అలాంటి రాజమౌళి కి అరుదైన గౌరవం దక్కింది.
అకాడమీ ఆఫ్ మోషన్ పిక్చర్ ఆర్ట్స్ అండ్ సైన్సెస్(AMPAS) సింపుల్‌గా చెప్పాలంటే ఆస్కార్స్ అకాడమీలో మెంబర్గా ఉండేందుకు రాజమౌళికి ఆహ్వనం దక్కింది. మొత్తంగా ప్రపంచవ్యాప్తంగా 57 దేశాల నుంచి 487 మందికి ఈ ఆహ్వానం దక్కగా, వీరిలో జక్కన్నతో పాటు ఆయన సతీమణి రమా రాజమౌళికి కూడా అకాడమీ నుంచి ఆహ్వానం రావడం మరో విశేషం. దర్శకుల విభాగంలో రాజమౌళికి, కాస్టూమ్ డిజైనర్స్ కేటగిరీలో రమా రాజమౌళికి ఈ అరుదైన గౌరవం దక్కనుంది. దీంతో 2025 ఆస్కార్‌లలో ఓటు వేసేందుకు ఈ మెంబర్లంతా అర్హత పొందారు. కాగా, ఈ గౌరవం దక్కించుకున్న రాజమౌళి దంపతులకు అభిమానులు అభినందనలు తెలుపుతున్నారు.
ప్రస్తుతం రాజమౌళి సూపర్ స్టార్ మహేశ్ బాబుతో SSMB 29 సినిమా చేస్తున్నారు. ప్రస్తుతం ప్రీ ప్రొడక్షన్ వర్క్ జరుపుకుంటోంది. సెట్స్పైకి ఎప్పుడు వెళ్తుందో స్పష్టంగా తెలీదు. ఫారెస్ట్ అడ్వెంచర్ బ్యాక్డ్రాప్తో మూవీ తెరకెక్కనుంది. దీని కోసం ప్రపంచవ్యాప్తంగా సినీ అభిమానులు ఎదురుచూస్తున్నారు.