నటుడు నందమూరి బాలకృష్ణ హోస్ట్‌గా చేస్తున్న టాక్ షో ‘అన్స్టాపబుల్ విత్ ఎన్‌బీకే’ ప్రేక్షకులలో విపరీతమైన ఆదరణ పొందింది. ఈ షోలో బాలయ్య హోస్టింగ్ విశేషం. ఆయన మాస్ మరియు ఎంటర్టైన్మెంట్ స్టైల్ ఈ కార్యక్రమానికి ప్రత్యేక ఆకర్షణగా నిలుస్తుంది. ఇప్పటికే మూడు సీజన్లు విజయవంతంగా పూర్తవ్వగా, తాజాగా నాలుగో సీజన్ ప్రారంభమైంది.
నాలుగో సీజన్ మొదటి ఎపిసోడ్‌కు ఆంధ్రప్రదేశ్ మాజీ సీఎం చంద్రబాబు నాయుడు గెస్ట్‌గా రావడం అందరినీ ఆకట్టుకుంది. అలాగే, పాన్-ఇండియా స్టార్ అల్లు అర్జున్ ‘పుష్ప 2: ది రూల్’ ప్రమోషన్స్లో భాగంగా ఈ షోలో పాల్గొని బాలయ్యతో సరదాగా గడిపారు. బన్నీ తన ఇద్దరు పిల్లలతో కలిసి ఈ షోలో సందడి చేయడం మరింత ప్రత్యేకత సంతరించుకుంది.
తాజాగా, యంగ్ బ్యూటీ శ్రీలీల కూడా ‘అన్స్టాపబుల్’ కొత్త ఎపిసోడ్‌లో పాల్గొన్నారు. భగవంత్ కేసరి సినిమాలో బాలయ్యతో కలిసి నటించిన శ్రీలీలకు, ప్రేక్షకుల నుంచి మంచి గుర్తింపు లభించింది. ఇప్పుడు ఈ కాంబినేషన్ టాక్ షోలో మరోసారి సందడి చేయబోతోందని తెలుస్తోంది. శ్రీలీల తాజాగా షూటింగ్‌లో పాల్గొన్న ఫొటోలు సోషల్ మీడియాలో వైరల్ అయ్యాయి. స్లీవ్‌లెస్ టాప్, చీర కట్టుతో కైవాన్ ముందు నిల్చున్న ఆమె స్టిల్స్ ఎంతోమంది ఫ్యాన్స్‌ను ఆకర్షించాయి. ఈ ఎపిసోడ్ ప్రోమో త్వరలో విడుదల కానున్నట్లు సమాచారం.
